Kakawin Sutasoma
This page has been accessed 25,555 times.
Front and Back Covers
[Perpustakaan KTR Dokbud Bali Prop. Dati I Bali
23/2/Ka/Dokbud]
[Judul: Kakawin Sutasoma K.23
Panj: 51 cm. Leb: 3,5 cm. Jml: 155 lb
Asal: Desa Tista, Abang, Karangasem]
[᭑ 1a]
᭚ ᭐ ᭛ ᬓᬓᬯᬶᬦ᭄ᬲᬸᬢᬲᭀᬫ᭟ [kakawin sutasoma; 23/2/ka] ᬤᬺᬯᬾᬦ᭄ᬳᬶᬯᬬᬦ [label] ᭛
Image 1
[᭑ 1B]
᭑
᭛ ᭜ ᭛ᬒᬁᬅᬯᬶᬖ᭄ᬦᬵᬫᬵᬲ᭄ᬢᬸ᭛ ᭜ ᭛ᬰ᭄ᬭᬷᬩᬚ᭄ᬭᬵᬚ᭄ᬜᬵᬦᬰᬹᬦ᭄ᬬᬵᬢ᭄ᬫᬓᬧᬭᬫᬲᬶᬭᬵᬦᬶᬦ᭄ᬤ᭄ᬬᬭᬶᬂᬭᬵᬢ᭄ᬯᬶᬰᬾᬱ᭞ᬮᬶᬮᬵᬰᬹᬤ᭄ᬥᬵᬧᬺᬢᬶᬱ᭄ᬝᬾᬂᬳᬺᬤᬬᬚᬬᬬᬵᬗ᭄ᬓᭃᬦ᭄ᬫᬳᬵᬲ᭄ᬯᬃᬕ᭄ᬕᬮᭀᬓ᭞ᬏᬓᬵᬲᬢ᭄ᬭᬾᬂᬰᬭᬶᬭᬵᬗᬸᬭᬶ
ᬧᬶᬲᬳᬦᬦᬶᬂᬪᬹᬃᬪᬸᬯᬄᬲ᭄ᬯᬄᬧ᭄ᬭᬓᬶᬃᬡ᭄ᬦ᭞ᬲᬵᬓ᭄ᬱᬢ᭄ᬘᬦ᭄ᬤ᭄ᬭᬵᬓ᭄ᬓᬧᬸᬃᬡ᭄ᬦᬤ᭄ᬪᬸᬢᬭᬶᬯᬶᬚᬶᬮᬶᬭᬵᬦ᭄ᬲᬗ᭄ᬓᬭᬶᬂᬩᭀᬤ᭄ᬥᬘᬷᬢ᭄ᬢᬗ᭄ᬮᬲᬶᬗ᭄ᬕᬶᬄᬬᬦ᭄ᬲᬶᬤ᭄ᬥᬬᭀᬕᬶᬰ᭄ᬯᬭᬯ᭄ᬓᬲᬶᬭᬲᬂᬲᬢ᭄ᬫ᭄ᬬᬮᬵᬯᬦ᭄ᬪᬝᬵᬭ᭞ᬲᬃᬯ᭄ᬯᬚ᭄ᬜᬵᬫᬹᬃᬢ᭄ᬢᬶᬰᬹᬦ᭄ᬬᬵᬕᬦᬮᬮᬶᬢᬶ
ᬦᬸᬘᬧ᭄ᬫᬸᬱ᭄ᬝᬶᬓᬶᬂᬥᬃᬫ᭄ᬫᬢᬢ᭄ᬯ᭞ᬲᬂᬲᬶᬧ᭄ᬢᬵᬦ᭄ᬧᬢ᭄ᬳᬸᬮᬶᬓ᭄ᬭᬶᬳᬢᬶᬲᬶᬭᬲ᭄ᬓᬸᬗᭂᬦ᭄ᬬᭀᬕᬮᬵᬯᬦ᭄ᬲᬫᬵᬥᬶ᭞ᬩ᭄ᬬᬓ᭄ᬢᬮ᭄ᬯᬶᬃᬪ᭄ᬭᬦ᭄ᬢᬘᬷᬳ᭄ᬢᬵᬗ᭄ᬭᬲᬭᬶᬯᬭᬶᬯᬦᬶᬂᬦᬶᬃᬫ᭄ᬫᬮᬵᬘᬶᬦ᭄ᬢ᭄ᬬᬭᬹᬧᬗ᭄ᬕ᭄ᬬᬦ᭄ᬤᬄᬬᬾᬓᬦ᭄ᬫᬗ᭄ᬓᬦᬵᬰᬦ᭄ᬢᬶᬓᬶᬦ᭄ᬜᭂᬧᬶᬢᬸᬢᬸᬃᬲᬂᬳᬸᬯᬸ
ᬲ᭄ᬲᬶᬤ᭄ᬥᬬᭀᬕᬶ᭞ᬧᬹᬚᬦ᭄ᬭᬶᬂᬚ᭄ᬜᬵᬦᬰᬹᬤ᭄ᬥᬵᬧᬭᬶᬫᬶᬢᬰᬭᬡᬵᬦᬶᬂᬫᬶᬓᭂᬢ᭄ᬮᬗ᭄ᬯᬮᬗ᭄ᬯᬦ᭄᭞ᬤᬹᬭᬵᬦ᭄ᬗ᭄ᬯᬂᬲᬶᬤ᭄ᬥ᭠ᬓᬯ᭄ᬬᬵᬗᬶᬤᬸᬗᬳᬶᬯᬗᬧᬦ᭄ᬢᬦ᭄ᬯ᭄ᬭᬸᬳᬶᬂᬰᬵᬲ᭄ᬢ᭄ᬭᬫᬢ᭄ᬭ᭞ᬗ᭄ᬳᬶᬂᬓᬾᬯ᭄ᬭᬦ᭄ᬤᬾᬦᬶᬗᬫ᭄ᬩᭂᬓ᭄ᬭᬕᬭᬕᬦᬶᬫᬦᬄᬲᬂᬓᬯᬷᬭᬵᬚ᭄ᬬ
[᭒ 2A]
ᬰᭀᬪ᭛ᬧᬹᬃᬯ᭄ᬯᬵᬧ᭄ᬭᬲ᭄ᬢᬵᬯᬦᬶᬂᬧᬃᬯ᭄ᬯᬭᬘᬡᬕᬶᬦ᭄ᬮᬵᬃᬲᬗ᭄ᬓᬭᬶᬂᬩᭀᬤ᭄ᬥᬓᬯ᭄ᬬ᭞ᬇᬦᬷᬤ᭄ᬯᬵᬧᬵᬭᬭᬶᬂᬢ᭄ᬭᬾᬢᬓᬺᬢᬬᬸᬕᬲᬶᬭᬂᬲᬃᬯ᭄ᬯᬥᬃᬫ᭄ᬫᬵᬗ᭄ᬕᬓᬵᬭ᭞ᬢᬦ᭄ᬮᬾᬦ᭄ᬳ᭄ᬬᬂᬩ᭄ᬭᬵᬳ᭄ᬫᬯᬶᬱ᭄ᬡ᭄ᬯᬷᬰ᭄ᬯᬭᬲᬶᬭᬫᬢ᭄ᬫᬄᬪᬹᬧᬢᬷᬫᬃᬢ᭄ᬬᬮᭀᬓ᭞ᬫᬗ᭄ᬓᬾᬧ᭄ᬭᬧ᭄ᬢᬂᬓ
ᬮᬷᬰ᭄ᬭᬷᬚᬶᬦᬧᬢᬶᬫᬦᬸᬭᬸᬦ᭄ᬫᬵᬢ᭄ᬦᬦᬂᬓᬵᬮᬫᬹᬃᬓ᭄ᬓ᭛ᬲᬫ᭄ᬩᬦ᭄ᬥᬦ᭄ᬰ᭄ᬭᬷᬫᬢᬵᬓᬾᬢᬸᬓᬸᬭᬸᬓᬸᬮᬲᬶᬭᬵᬦ᭠ᬓ᭄ᬦᬶᬭᬵᬂᬓᭀᬭᬯᬵᬗ᭄ᬰ᭞ᬤᬾᬯᬶᬧ᭄ᬭᬚ᭄ᬜᬵᬥᬭᬷᬓᬵᬲᬶᬳᬶᬭᬧᬶᬦᬸᬚᬶᬭᬶᬂᬭᬵᬢ᭄ᬧᬸᬢᬸᬲ᭄ᬭᬷᬓᬳᬬᬸᬦ᭄᭞ᬗ᭄ᬓᬵᬦᬾᬂᬭᬵᬚ᭄ᬬᬵᬥᬶᬓᬾ
ᬗ᭄ᬳᬲ᭄ᬢᬶᬦᬲᬶᬦᬶᬯᬶᬢ᭄ᬓᬧ᭄ᬦᬶᬂᬫᬳᬵᬯᬷᬭᬲ᭛᭞ᬲᬓ᭄ᬯᬾᬄᬓ᭄ᬯᬾᬄᬲᬂᬯᬢᭂᬓ᭄ᬪᬹᬧᬢᬶᬲᬶᬭᬫᬭᬋᬫ᭄ᬪᬓ᭄ᬢᬶᬭᬶᬂᬰ᭄ᬭᬷ᭠ᬦᬭᬾᬦ᭄ᬤ᭄ᬭ᭛ᬰᭀᬪᬂᬭᬵᬚ᭄ᬬᬵᬳᬍᬧ᭄ᬮ᭄ᬯᬶᬃᬲ᭄ᬫᬭᬪᬯᬦᬍᬬᭂᬧ᭄ᬲᬃᬯ᭄ᬯᬤᬷᬩ᭄ᬬᬵᬧ᭄ᬭᬫᬾᬬ᭞ᬤ᭄ᬯᬵᬭᬦ᭄ᬬᬵᬫᬃᬧ᭄ᬧᬢᬢ᭄ᬬᬵᬤ᭄ᬪᬸ᭠
ᬢᬓᬦᬓᬫᬸᬭᬸᬩ᭄ᬮ᭄ᬯᬶᬃᬕᬸᬦᬸᬂᬩᬳ᭄ᬦᬶᬫᬸᬦ᭄ᬢᬩ᭄᭞ᬲᭃᬓ᭄ᬭᬗ᭄ᬓᬂᬫᬲ᭄ᬫᬡᬷᬦ᭄ᬤ᭄ᬭᬾᬤᬍᬫᬶᬓᬓᬸᬫ᭄ᬜᬃᬭᬵᬢ᭄ᬦᬲ᭛ᬦ᭄ᬬᬫᬸᬜ᭄ᬘᬭ᭄᭞ᬤᬶᬧ᭄ᬳᬵᬂᬯᬵᬭᬢ᭄ᬭᬶᬤᬾᬦ᭄ᬬᬵᬭᬳᬶᬦᬲᬫᬳᬶᬥᭂᬧ᭄ᬦᬶᬂᬯ᭄ᬯᬗᬶᬂᬚ᭄ᬭᭀᬓᬥᬢ᭄ᬯᬦ᭄᭞᭛ᬓᬶᬦ᭄ᬢᬸᬧ᭄ᬯᬾᬓᬂᬲᬭ᭠
Image 2
[᭒ 2B]
᭒
ᬢ᭄ᬤᬸᬃᬩ᭄ᬪᬮᬓᬶᬦᬭᬡᬦᬶᬂᬤᬿᬢ᭄ᬬᬮᬾᬦ᭄ᬭᬵᬓ᭄ᬱᬲᬵᬓ᭄ᬯᬾᬄ᭞ᬓᬶᬃᬡ᭄ᬦᬵᬕ᭄ᬮᬃᬲᭃᬓ᭄ᬧᭂᬦᬸᬄᬭᬶᬂᬳᭂᬯᬦᬘᬮᬦᬶᬓᬦᬂᬭᬵᬢ᭄ᬦᬓᬡ᭄ᬟᬵᬤᬶᬭᬵᬚ᭄ᬬ᭞ᬓ᭄ᬭᬹᬭᬵᬫᬺᬧ᭄ᬓᬸᬯ᭄ᬯᬫᬸᬂᬫᬫᬶᬭᬸᬭᬸᬢᬤᬯᬦ᭄ᬯᬦ᭄ᬯᬲᬜ᭄ᬘᬸᬃᬦ?ᬦᬤᬾᬦ᭄ᬬ᭞ᬯ᭄ᬭᬶᬦ᭄ᬯ᭄ᬭᬶᬦ᭄ᬲᬓ᭄ᬯᬾᬄᬯ
ᬢᭂᬓ᭄ᬪᬵᬭᬢᬓᬸᬮᬓᬭᬸᬳᬸᬦ᭄ᬲᬂᬢᬧᬵᬲ᭄ᬯᬷᬦᬕᬵᬕ᭄ᬭ᭛ᬦᬵᬳᬾᬢᬸᬰ᭄ᬭᬷᬦᬭᬾᬦ᭄ᬤ᭄ᬭᬵᬗᬸᬢᬸᬲᬶᬲᬳᬦᬦᬶᬂᬯᬷᬭᬬᭀᬥᬵᬤ᭄ᬪᬸᬢᬾᬂᬧ᭄ᬭᬂ᭞ᬫ᭄ᬯᬂᬲᬂᬬᭀᬕᬷᬰ᭄ᬯᬭᬵᬗᬫ᭄ᬧᭂᬳᬭᬶᬧᬫᬦᬲᬶᬂᬤᬾᬢ᭄ᬬᬓᬵᬮᬵᬕ᭄ᬦᬶᬢᬸᬮ᭄ᬬ᭞ᬦ᭄ᬤᬵᬢᬦᬦ᭄ᬢᬸᬓ᭄ᬚᬸᬕᬵᬗ᭄ᬳᬶᬂ
ᬲᬸᬢᬳᬚᬶᬓᬋᬗᭃᬪᬱ᭄ᬝ᭄ᬬᬦᬶᬂᬰᬢ᭄ᬭᬸᬰᬓ᭄ᬢᬶ᭞ᬫᬗ᭄ᬓᬵᬮᬶᬂᬲᬂᬫᬸᬦᬶᬦ᭄ᬤ᭄ᬭᬵᬓᬶᬭᬓᬶᬭᬭᬶᬳᬚᭂᬂᬰ᭄ᬭᬷᬫᬳᬵᬓᬾᬢᬸᬭᬵᬚ᭛ᬯᬃᬡ᭄ᬦᬦ᭄ᬲᬂᬰ᭄ᬭᬷᬦᬭᬾᬦ᭄ᬤ᭄ᬭᬵᬥᬶᬧᬲᬶᬭᬫᬳᬋᬧ᭄ᬫᬵᬦᬓᬵᬫ᭄ᬯᬂᬲᬸᬤᬾᬯᬷ᭞ᬳᬾᬢᬸᬦ᭄ᬬᬵᬦ᭄ᬩᭀᬤ᭄ᬥᬶᬘᬷᬢ᭄ᬢᬾᬦᬸᬮᬳᬸ
ᬮᬳᬶᬭᬭᬶᬂᬲ᭄ᬣᬵᬦᬲᬗ᭄ᬳ᭄ᬬᬂᬚᬶᬦᬵᬃᬘ᭄ᬘ᭞ᬋᬧ᭄ᬧ᭄ᬭᬵᬧ᭄ᬢᬂᬭᬢ᭄ᬭᬶᬢᬶᬲ᭄ᬢᬶᬲ᭄ᬫᬋᬗᬶᬳ᭄ᬦᬶᬗᬶᬓᬂᬚ᭄ᬜᬵᬦᬘᬵᬦ᭄ᬤ᭄ᬭᭀᬧᬫᬦ᭄ᬬ᭞ᬗ᭄ᬓᬵᬢᬵᬰ᭄ᬭᬷᬩᭀᬤ᭄ᬥᬶᬲᬢ᭄ᬯᬵᬚᬭᬶᬕ᭄ᬢᬶᬦᬶᬭᬬᬦ᭄ᬲᬸᬦ᭄ᬯᬲᬂᬰ᭄ᬭᬷᬦᬭᬾᬦ᭄ᬤ᭄ᬭ᭛ᬢᬸᬱ᭄ᬝᬵᬫ᭄ᬩᭂᬓ᭄ᬰ᭄ᬭᬷᬫᬳᬵᬓᬾᬢᬸᬫᬦᭂᬫᬸ
[᭓ 3A]
ᬧᬭᬫᬵᬦᬸᬕ᭄ᬭᬳᬵᬳ᭄ᬬᬂᬚᬶᬦᬾᬦ᭄ᬤ᭄ᬭ᭞ᬰᬶᬖ᭄ᬭᭀᬦᬫ᭄ᬧᭂᬄᬦᬶᬭᬂᬬᭀᬕᬯ᭄ᬓᬲᬦᬸᬫᬶᬚᬶᬮ᭄ᬰᭀᬪᬲᬗ᭄ᬓᬾᬂᬧᬳᭀᬫᬦ᭄᭞ᬧ᭄ᬭᬧ᭄ᬢᬾᬗ᭄ᬓᬵᬦᬾᬂᬲᬸᬤᬾᬯᬷᬲᬶᬭᬫᬯᬭᬯᬭᬄᬬᬦ᭄ᬳᬸᬯᬸᬲ᭄ᬮᬩ᭄ᬤᬓᬵᬃᬬ᭄ᬬ᭞ᬩ᭄ᬬᬓ᭄ᬢᬂᬭᬵᬢ᭄ᬲ᭄ᬯᬲ᭄ᬣᬘᬹᬃᬡ᭄ᬦᬂᬓᬮᬶᬳᭂᬍᬫᬶᬯᬶᬚᬶᬮ᭄
ᬰ᭄ᬭᬷᬫᬳᬵᬰᬓ᭄ᬬᬲᬶᬗ᭄ᬳᬵ᭛ᬦ᭄ᬤᬄᬰ᭄ᬭᬷᬖ᭄ᬭᬂᬓᬵᬮᬢᬤ᭄ᬤ᭄ᬯᬵᬗᬶᬥᬫᬶᬓᬲᬶᬭᬲᬂᬰ᭄ᬭᬷᬫᬳᬵᬭᬵᬚᬧᬸᬢ᭄ᬭᬶ᭞ᬳᬵᬃᬱᬵᬫ᭄ᬩᭂᬓ᭄ᬰ᭄ᬭᬷᬦᬭᬾᬦ᭄ᬤ᭄ᬭᬵᬗᬭᬶᬯᬸᬯᬸᬭᬶᬫᬦᬄᬲᬂᬲ᭄ᬥᭂᬂᬓᬾᬲ᭄ᬬᬦᬵᬫ᭄ᬭᬢ᭄᭞ᬧᬹᬚᬵᬫᬦ᭄ᬢ᭄ᬭᬵᬲ᭄ᬢᬸᬢᬶᬫ᭄ᬯᬂᬲᬬᬸᬲᬬᬸᬢᬶᬦᬶᬢᭃᬳᭀᬫᬬᬚ᭄ᬜᬵᬦᬸ
ᬓᬵᬭᬶ᭞ᬲᬓ᭄ᬯᬾᬄᬲᬂᬪᬶᬓ᭄ᬱᬸᬓᬵᬘᬵᬃᬬ᭄ᬬᬦᬕᬭᬳᬸᬫᬶᬭᬶᬂᬬᭀᬕᬲᬂᬰ᭄ᬭᬷᬦᬭᬾᬦ᭄ᬤ᭄ᬭ᭛ᬦ᭄ᬤᬄᬲᬓ᭄ᬯᬾᬄᬓ᭄ᬯᬾᬄᬦᬶᬓᬂᬲ᭄ᬢ᭄ᬭᬷᬤᬓᭂᬫᬶᬓᬭᬸᬫ᭄ᬗᭃᬕᬃᬩ᭄ᬪᬶᬦᬷᬰ᭄ᬭᬷᬲᬸᬧᬢ᭄ᬦᬶ᭞ᬯᬺᬤ᭄ᬥᬵᬮᬾᬓ᭄ᬰ᭄ᬭᬷᬖ᭄ᬭᬫᭀᬮᬄᬯ᭄ᬢᭂᬗᬶᬭᬫᬢᬸᬢᬸᬃᬲᬗ᭄ᬳᬦᬾᬂᬕᬃᬩ᭄ᬪᬤᬶᬩ᭄ᬬ᭞ᬮᬶᬡ᭄ᬟᬹ
ᬢᬂᬪᬹᬫᬶᬢᬾᬚᬵᬦᬭᬯᬢᬤᬸᬫᬶᬮᬄᬢ᭄ᬭᬸᬲ᭄ᬢᭂᬓᬾᬂᬲ᭄ᬯᬃᬕ᭄ᬕᬮᭀᬓ᭞ᬳᬸᬁᬳᬸᬁᬦᬶᬂᬤᬾᬯᬲᬗ᭄ᬖ᭄ᬬᬾᬂᬮᬗᬶᬢᬚᬬᬚᬬᬦ᭄ᬲᭀᬢ᭄ᬢᬦᬶᬂᬩᬸᬤ᭄ᬥᬚᬦ᭄ᬫ᭛ ᭜ ᭛ᬅᬣᬭᬶᬲ᭄ᬥᭂᬂᬯᬢᭂᬓ᭄ᬳ᭄ᬬᬗᬶᬓᬬᬦ᭄ᬧᬫᬹᬃᬱᬶᬢᬫᬫᬸᬱ᭄ᬧᬦᬶᬂᬦᬵᬕᬭ᭞ᬧ᭄ᬭᬫᬸ
Image 3
[ᬑ 3B]
ᬑ
ᬓᬦᬝᬵᬳᬭᬰᬓ᭄ᬭᬲᬓᬶᬦ᭄ᬦᬭᬵᬥᬶᬧᬲᬸᬭᬵᬃᬱᬶᬤᬾᬯ᭛ᬓᬓ᭄ᬱᬡᬦᬸᬫᬶᬚᬶᬮ᭄ᬪᬝᬵᬭᬚᬶᬦᬭᬹᬧᬰᬹᬤ᭄ᬥᬓᬸᬮᬭᬚᬧᬸᬢ᭄ᬭᬵᬥᬶᬓ᭞ᬲᬸᬓᬢᬫᬦᬄᬦᬭᬾᬦ᭄ᬤ᭄ᬭᬮᬸᬫᬶᬳᬢ᭄ᬲᬶᬭᬾᬗᬦᬓ᭄ᬧᬹᬃᬯ᭄ᬯᬭᬶᬂᬓᬵᬤ᭄ᬪᬸᬢ᭛ᬅᬧᬶᬢᬸᬯᬶᬲᬃᬯ᭄ᬯᬧᬬᬯᬶᬦᬵᬱᬰ
ᬪᬱ᭄ᬫᬶᬭᬶᬯᬶᬚᬶᬮ᭄ᬦᬶᬭᬵᬦᬶᬦ᭄ᬤᬶᬢ᭞ᬢᬸᬫᬶᬢᬶᬲᬸᬫᬸᬗ᭄ᬓᬸᬢᬵᬃᬚ᭄ᬚᬫᬩ᭄ᬦᭂᬃᬩᬸᬮᬾᬯᬮᬶᬓᬲᬸᬱ᭄ᬝᬫᬵᬃᬬ᭄ᬬᬵᬳᬮ᭞ᬓᬶᬫᬸᬢᬢᬶᬓᬂᬯᬸᬚᬶᬮ᭄ᬤᬤᬶᬫᬕᭂᬂᬢᬧᬲ᭄ᬳᬶᬋᬡ᭄ᬕᬦᬾᬓᬲᭀᬕᬓ᭄ᬱᬬ᭞ᬓᬭᬡᬦᬶᬓᬂᬲᬭᬵᬚ᭄ᬬᬧᬥᬪᬓ᭄ᬢ᭄ᬬᬗᬲ᭄ᬢᬸᬢᬶᬭᬶᬚᭃᬂᬦᬭᬾᬦ᭄ᬤ᭄ᬭᬵ᭠
ᬢ᭄ᬫᬚ᭛ᬗᬸᬦᬶᬗᬸᬲᬂᬯ᭄ᬯᬗᬤ᭄ᬬᬳᬶᬤᬍᬫ᭄ᬓᬫᬹᬳᬦᬶᬲᬶᬭᬵᬫᬶᬳᬢ᭄ᬓᬵᬲᬺᬧᬦ᭄᭞ᬓᬓᬓᬓᬮᬾᬦ᭄ᬦᬸᬯᬾᬜᬫᬢᬸᬮᬸᬂᬧᬥᬵᬗ᭄ᬤᬦᬶᬳᬚᭃᬂᬦᬶᬭᬵᬗ᭄ᬤᬾᬲᬸᬓ᭞ᬳᬦᬲᬶᬭᬯᬺᬤ᭄ᬥᬓᬶᬮ᭄ᬬᬦᬶᬓ᭄ᬮᬷᬓᬭᬓ᭄ᬯᬦᬶᬓᬸᬢᬸᬲ᭄ᬦᬭᬾᬦ᭄ᬤ᭄ᬭᬵᬥᬶᬧ᭞ᬧᬮᬶᬦᬶ᭠
ᬭᬢᬦ᭄ᬓᬸᬭᬂᬲᬧᬗᬶᬓᬵᬃᬚ᭄ᬚᬲᬵᬫ᭄ᬧᬸᬦᬋᬧᬢ᭄ᬲᬫᬵᬓᬾᬄᬫᬋᬓ᭄᭛᭜᭛ᬢᬦ᭄ᬯᬃᬡ᭄ᬦᬦ᭄ᬭᬶᬮᬯᬲ᭄ᬦᬶᬭᬵᬋᬚᬫᬦᭀᬳᬭᬳᬶᬦᬸᬦᬶᬗᬦᬶᬂᬯ᭄ᬯᬗᬶᬗ᭄ᬧᬸᬭᬶ᭞ᬲᬵᬫ᭄ᬧᬸᬦ᭄ᬭᬵᬓ᭄ᬯᬕ᭄ᬦᭂᬧ᭄ᬧᬶᬢᬸᬂᬯᬸᬮᬦᬶᬓᬂᬤᬶᬦᬢ᭄ᬫᬸᬩᬜᬸᬲᬗ᭄ᬲᬬᬵᬢᬸᬳ᭞ᬓ᭄ᬬᬵᬢᬶᬂᬰ᭄ᬭᬷ
[᭔ 4A]
ᬲᬸᬢᬲᭀᬫᬫᬦᬵᬫᬦᬶᬭᬤᬾᬦᬺᬧᬢᬶᬯᬶᬦᬸᬗᬸᬲᬶᬂᬚᬕᬢ᭄ᬓᬩᬾᬄ᭞ᬲᬗ᭄ᬓᬾᬯᬃᬡ᭄ᬦᬦᬶᬭᬵᬕᬯᬾᬲᬸᬓᬦᬶᬓᬂᬪᬸᬯᬦᬧᬶᬦᬓᬫᬸᬱ᭄ᬝᬶᬦᬶᬂᬳᬶᬥᬾᬧ᭄᭛ᬮ᭄ᬯᬶᬃᬭᬶᬂᬲ᭄ᬯᬧ᭄ᬦᬢᬸᬯᬸᬄᬦᬶᬭᬾᬗ᭄ᬕᬮᬗᬤᭂᬕ᭄ᬮᬕᬸᬢᬮᬬᬸᬓᬸᬫᬵᬭᬲᬤᬺᬰ᭞ᬲᭀᬮᬄᬪᬹᬯᬦᬶᬭᬾᬓᬶᬘᬸᬫ᭄ᬕᬸ
ᬧᬶᬦᬘᭂᬄᬧᬘᭂᬳᬜᬮᬸᬓᬶᬳᬾᬢᬸᬦᬶᬂᬕᬸᬬᬸ᭞ᬲᬂᬲᬶᬧ᭄ᬢᬦ᭄ᬭᬶᬳᬸᬯᬸᬲ᭄ᬦᬶᬭᬵᬧᬸᬧᬓᬕᭃᬢᬸᬫᬭᬸᬡᬧᬭᬶᬧᬹᬃᬡ᭄ᬦᬬᬸᬰ᭄ᬭᬫ᭞ᬳ᭄ᬬᬂᬦᬶᬂᬓᬶᬗ᭄ᬓᬶᬗᬗᬶᬡ᭄ᬤᬭᬵᬢ᭄ᬲ᭄ᬫᬦᬶᬭᬹᬧ᭄ᬦᬶᬭᬯᬳᬸᬢᬸᬫᬸᬭᬸᬦ᭄ᬲᬓᬾᬂᬢᬯᬂ᭛ᬦ᭄ᬤᬶᬦ᭄ᬗ᭄ᬕᬦ᭄ᬬᬗ᭄ᬯᬕᬦᭂᬲ᭄ᬯᬭᬵᬕᬲᬸᬢᬌᬚᬓᬤᬶᬲᬶᬭᬲᬸᬭᬹᬧ
ᬤᬶᬕ᭄ᬚᬬ᭞ᬲ᭄ᬢ᭄ᬭᬷᬲ᭄ᬢ᭄ᬭᬷᬚ᭄ᬭᭀᬧᬸᬭᬍᬂᬍᬗᬾᬧᬸᬓᬲᭂᬓᬦ᭄ᬲ᭄ᬫᬭᬮᬸᬫᬶᬳᬢᬶᬲᬂᬦᬺᬧᬵᬢ᭄ᬫᬚ᭞ᬢᭂᬓ᭄ᬯᬦ᭄ᬭᬲᬶᬭᬾᬓᬶᬯᬶᬚ᭄ᬜᬓᬤᬶᬢᬦ᭄ᬳᬦᬲᬶᬭᬶᬗᬦᬶᬭᬾᬂᬧ᭄ᬭᬮᬵᬧᬶᬢ᭞ᬩᬂᬬ᭄ᬬᬦ᭄ᬭᬢ᭄ᬭᬶᬕᬸᬭᬶᬢ᭄ᬦᬶᬭᬾᬓᬶᬯᬶᬦᬶᬯᬾᬓᬭᬶᬦᬲᬦᬫᬗᬸᬦ᭄ᬮᬭᬾᬳᬢᬶ᭛ᬫᬗ᭄ᬓᬶᬦ᭄ᬳᬶᬩ᭄ᬭᬫᬦᬄ
ᬦ᭄ᬬᬬᬦ᭄ᬫᬗᭂᬦᬶᬭᬰ᭄ᬫᬶᬦᬶᬭᬧᬶᬦᬓᬤᬾᬯᬦᬶᬂᬧᬸᬭᬶ᭞ᬱ᭄ᬭᬚ᭄ᬜᬾᬂᬕᬷᬢᬯᬶᬘᬓ᭄ᬱᬡᬵᬦ᭄ᬯᬫᬕᬸᬡᬯ᭄ᬭᬸᬳᬗᬶᬦᬓᬶᬩᬸᬤ᭄ᬥᬶᬦᬶᬂᬧᬭ᭞ᬰᬵᬲ᭄ᬢ᭄ᬭᬚ᭄ᬜᬵᬤᬶᬓᬯᬺᬘᬷᬢ᭄ᬢᬫᬲᬶᬳᬶᬂᬓᬲᬶᬳᬦᬶᬓᬫᬭᬵᬃᬣᬓᬾᬯᬮ᭞ᬲᬃᬯ᭄ᬯᬵᬤ᭄ᬪᬸᬢᬲᬗ᭄ᬓᬭᬶᬂᬫᬦᬳᬦᬾᬓᬢᬸ
Image 4
[᭔ 4b]
᭔
ᬳᬸᬢᬸᬳᬸᬚᬶᬦᬵᬢ᭄ᬫᬓᬾᬂᬧ᭄ᬭᬚ᭛ᬬᬾᬓᬵᬳᭂᬢᬸᬦᬶᬓᬂᬚᬕᬢ᭄ᬧᬥᬲᬸᬪᬓ᭄ᬢᬶᬫᬮᬸᬮᬸᬯᬶᬲᬶᬭᬵᬫ᭄ᬩᭂᬓᬹᬢ᭄ᬢᬫ᭞ᬲᬵᬫᬦ᭄ᬢᬵᬧ᭄ᬭᬦᬸᬣᬷᬭᬬᭀᬥᬚᬸᬕᬢᬦ᭄ᬳᬦᬮᬸᬧᬸᬢᬶᬫᬦᬄᬦᬶᬓᬾᬗ᭄ᬳᬢᬶ᭞ᬫ᭄ᬯᬂᬭᬓ᭄ᬭ᭄ᬬᬦ᭄ᬫᬧᬢᬶᬄᬚᬬᬾᬦ᭄ᬤ᭄ᬭᬲᬶᬭᬢᬦ᭄ᬲᬶᬧᬶᬫᬦᬳᬶᬭᬭᬶᬂᬦᬺᬧᬵᬢ᭄ᬫᬚ᭞ᬯᬶᬧ᭄ᬭᬵᬕ᭄ᬭᬵ
ᬦᬸᬧᬫᬵᬤᬶᬦᬶᬂᬓᬸᬰᬮᬧᬡ᭄ᬥᬶᬢᬦᬕᬭᬦᬬᬚ᭄ᬜᬲᬲ᭄ᬫ᭄ᬭᬢᬶ᭛ᬮᬸᬫ᭄ᬭᬾᬂᬭᬵᬢ᭄ᬲᬸᬤᬕᬾᬂᬢ᭄ᬭᬶᬮᭀᬓᬓᬚᬦᬵᬧ᭄ᬭᬶᬬᬦᬶᬭᬓᬢ᭄ᬓᬾᬂᬧᬸᬭᬦ᭄ᬢᬭ᭞ᬭᬶᬂᬲ᭄ᬯᬃᬕ᭄ᬕᬵᬲ᭄ᬣᬦᬪᬝᬵᬭᬰᬫ᭄ᬪᬸᬧᬭᬤᬾᬯᬕᬡᬫᬶᬮᬸᬫᬗᬲ᭄ᬢᬯᬾᬲᬶᬭ᭞ᬗ᭄ᬳᬶᬂᬢᬾᬓᬂᬲᬸᬭᬓᬦ᭄ᬬᬓᬵᬲ᭄ᬫᬸᬯᬶᬯᬮ᭄ᬫᬶᬳᬳᬶᬫᬦᬶ
ᬲᬶᬭᬾᬂᬲ᭄ᬯᬦᬵᬕᬭ᭞ᬤᬾᬦᬶᬂᬩᬸᬤ᭄ᬥᬶᬦᬶᬭᬵᬕ᭄ᬭᬳᬾᬂᬫᬤᬦᬢᬦ᭄ᬢ᭄ᬭᬫᬦᬮᬳᬫᬭᬶᬂᬲ᭄ᬤᭂᬂᬭᬶᬫᬂ᭛ᬲᬶᬗ᭄ᬕᬶᬄᬬᬦ᭄ᬚᬶᬦᬫᬹᬃᬢ᭄ᬢᬶᬕᬸᬤ᭄ᬥᬓᬸᬮᬯᬗ᭄ᬰᬚᬯ᭄ᬮᬯ᭄ᬮᬰᬵᬲ᭄ᬢ᭄ᬭᬧᬵᬭᬕ᭞ᬲᬶᬗ᭄ᬳᬶᬢ᭄ᬭᬶᬂᬩ᭄ᬭᬢᬬᭀᬕᬫᬦ᭄ᬢ᭄ᬭᬲᬢᬸᬯᬸᬄᬲᬶᬭᬲᬢᬢᬲᬸᬪᬓ᭄ᬢᬶᬭᬶᬂᬕᬸᬭᬸ᭞ᬰ᭄ᬭᬷᬚ᭄ᬜ᭄ᬬᬵᬦᬾᬰ᭄ᬯᬭᬩᬚ᭄ᬭᬭᬓ᭄ᬯᬕᬸᬯᬸ
ᬲᬂᬧ᭄ᬭᬪᬸᬕᬸᬭᬸᬦᬸᬭᬲᬂᬦᬺᬱᬵᬢ᭄ᬫᬚ᭞ᬦᬵᬳᬾᬢᬸᬦ᭄ᬬᬢᬶᬓᬂᬓᬯᬸᬗ᭄ᬓᬚᬦᬢᬦ᭄ᬤᬳᬢᬳ᭄ᬮᬶᬓᬲᬵᬥᬸᬦᬹᬢ᭄ᬢᬫ᭛ᬩᬸᬤ᭄ᬥᬷᬰ᭄ᬭᬷᬦᬭᬦᬵᬣᬫᬗ᭄ᬓᬶᬦ᭄ᬢᬼᬩ᭄ᬲᬶᬳᬶᬭᬭᬶᬲᬶᬭᬲᬂᬦᬺᬧᬵᬢ᭄ᬫᬚ᭞ᬗ᭄ᬳᬶᬂᬲ᭄ᬢ᭄ᬭᬷᬭᬵᬢ᭄ᬦᬯᬶᬰᬾᬱᬬᭀᬕ᭄ᬬᬧᬲᬸᬗᬾᬲᬶᬭᬫᬬᬸᬕᬮᬭᬵᬚᬧᬸᬢ᭄ᬭᬶ
[᭕ 5A]
ᬓ᭞ᬢᭂᬓ᭄ᬯᬦ᭄ᬭᬓ᭄ᬯᬲᬶᬭᬾᬓᬶᬦᬲ᭄ᬢ᭄ᬯᬓ᭄ᬦᬪᬹᬧᬢᬶᬧᬗᬸᬘᬧᬶᬭᬾᬦᬭᬾᬰ᭄ᬯᬭ᭞ᬗ᭄ᬓᬵᬦᬵᬣᬢᬭᬓ᭄ᬯᬫᬗ᭄ᬚᬸᬭᬸᬲᬸᬫᬶᬯ᭄ᬬᬢᬸᬫᬸᬢᬭᬶᬲᬶᬭᬂᬯᬢᭂᬓ᭄ᬭᬢᬸ᭛ᬦ᭄ᬤᬦ᭄ᬲᬓ᭄ᬯᬾᬄᬤᬶᬭᬲᬂᬫᬋᬓ᭄ᬧ᭄ᬭᬫᬸᬓᬲᬂᬤ᭄ᬯᬶᬚᬯᬭᬋᬱᬶᬰᬾᬯᬲᭀᬕᬢ᭞ᬓᬧ᭄ᬯᬵᬪᬹᬢᬶ
ᬯᬸᬯᬸᬲ᭄ᬦᬭᬾᬦ᭄ᬤ᭄ᬭᬢᬸᬳᬸᬤᬃᬫ᭄ᬫᬓᬭᬡᬫᬕᬯᬾᬚᬕᬢ᭄ᬥᬶᬢ᭞ᬰᬶᬖ᭄ᬭᬵᬂᬤᬹᬢᬓᬶᬦᭀᬦ᭄ᬮᬸᬫᬓ᭄ᬯᬫᬋᬓᬾᬂᬦᬺᬧᬲᬸᬢᬫᬜ᭄ᬚᬶᬗᬾᬂᬧᬸᬭᬶ᭞ᬲᬵᬫ᭄ᬧᬸᬦ᭄ᬧ᭄ᬭᬵᬧ᭄ᬢᬭᬶᬲᬦ᭄ᬫᬸᬓᬵᬦᬺᬧᬢᬶᬲᬂᬦᬺᬧᬲᬸᬢᬢᬸᬫᬸᬮᬸᬲ᭄ᬫᬗᬜ᭄ᬚᬮᬶ᭛᭜᭛ᬑᬫ᭄ᬧᬸᬢ᭄ᬭᬗ᭄ᬓᬸᬪ
ᬝᬵᬭᬩᬸᬤ᭄ᬥᬓᬶᬦᬪᬓ᭄ᬢ᭄ᬬᬦ᭄ᬢᬧ᭄ᬭᬫᬵᬡᬾᬗ᭄ᬳᬸᬮᬸᬦ᭄᭞ᬲ᭄ᬯᬲ᭄ᬢ᭄ᬬᬵᬲ᭄ᬢᬸᬧ᭄ᬭᬪᬸᬥᬃᬫ᭄ᬫᬫᬹᬃᬢ᭄ᬢᬶᬗᬸᬲᬶᬋᬦ᭄ᬢᬵᬗ᭄ᬭᬓ᭄ᬱᬥᬃᬫ᭄ᬫᬲ᭄ᬣᬶᬢᬶ᭞ᬆᬧᬦ᭄ᬩ᭄ᬬᬓ᭄ᬢᬳᬶᬬᬂᬕᭂᬍᬳ᭄ᬕᭂᬍᬳᬶᬓᬂᬭᬢ᭄ᬬᬦ᭄ᬓᬶᬢᬾᬓᬵᬦ᭄ᬤᬶᬭᬶ᭞ᬧᬗ᭄ᬮᬶᬗ᭄ᬕᬦ᭄ᬭᬶᬯᬶᬚᬶᬮ᭄ᬢᬗᬹᬦᬶᬫᬕᬯᬾᬢᬸᬱ᭄ᬝᬵ᭠
ᬧ᭄ᬭᬫᬡᬾᬂᬚᬕᬢ᭄᭛ᬲᬂᬲᬶᬧ᭄ᬢᬦ᭄ᬬᬢᬸᬳᬦ᭄ᬓᬸᬭᬓ᭄ᬯᬓᬶᬢᬭᬢ᭄ᬯᬵᬦᬸᬕ᭄ᬭᬳᬗ᭄ᬓ᭄ᬯᬷᬓᬶᬢ᭞ᬲᬓ᭄ᬯᬾᬄᬲᬂᬧᬭᬦᬵᬣᬬᬾᬧ᭄ᬓᬶᬦᬗᭂᬦ᭄ᬲᬫᬦ᭄ᬢᬬᭀᬧ᭄ᬭᬪᬸ᭞ᬲᬵᬫ᭄ᬩ᭄ᬬᬵᬲᭀᬫᬳᬦᬾᬓᬶᬫᬵᬲ᭄ᬢ᭄ᬯᬓ᭄ᬦᬤᭀᬦ᭄ᬢᬾᬪᬹᬫᬶᬭᬵᬚᬵᬥᬶᬧ᭞ᬗ᭄ᬓᬵᬭᬓ᭄ᬭ᭄ᬬᬦ᭄
Image 5
[᭕ 5B]
᭕
ᬫᬶᬳᬢᬾᬭᬭᬦ᭄ᬬᬧᬶᬮᬶᬳᭂᬦ᭄ᬦ᭄ᬤᬦ᭄ᬲᬶᬂᬲᬬᭀᬕ᭄ᬬᬮᬧᭂᬦ᭄᭛ᬢᭂᬓ᭄ᬯᬦ᭄ᬭᬓ᭄ᬯᬓᬶᬢᬾᬭᬭᬦ᭄ᬬᬧᬶᬮᬶᬳᭂᬦ᭄ᬦ᭄ᬤᬦ᭄ᬲᬶᬂᬲᬬᭀᬕ᭄ᬬᬵᬮᬧᭂᬦ᭄᭛ᬢᭂᬓ᭄ᬯᬦ᭄ᬭᬓ᭄ᬯᬓᬶᬢᬾᬓᬶᬫᬗ᭄ᬕᬮᬯᬶᬰᬾᬱᬵᬫᬸᬫ᭄ᬧᬸᬦᬶᬲ᭄ᬢ᭄ᬭ᭄ᬬᬵᬳᬚᭂᬂ᭞ᬭᬵᬢ᭄ᬦᬵᬲ᭄ᬯᬂᬫᬡᬶᬭᬵᬚᬧᬓ᭄ᬱᬶᬘᬸᬭᬶᬕᬦ᭄ᬤᬦ᭄ᬲᬶᬂᬍᬯᬶᬄᬭᬶᬂᬚᬕᬢ᭄᭞ᬫᬗ᭄ᬕᭂᬄᬤᬺᬯ᭄ᬬᬗᬶᬲᬂᬦᬭᬾᬦ᭄ᬤ᭄ᬭᬓᬭᬸᬳᬸᬦ᭄ᬢᬂᬚᬶᬯ᭄ᬯ
ᬦᬶᬂᬭᬵᬢ᭄ᬓᬩᬾᬄ᭞ᬬᬧ᭄ᬯᬦ᭄ᬮᬗ᭄ᬖ᭄ᬬᬦᬯᬵᬥᬥᬡ᭄ᬥᬦᬶᬬᬢᬂᬯ᭄ᬯᬂᬬᬦ᭄ᬧ᭄ᬭᬲᬗ᭄ᬖᬾᬂᬓᬶᬢ᭛ᬮᬵᬯᬦ᭄ᬢᬦ᭄ᬳᬦᬬᬸᬓ᭄ᬢ᭄ᬬᬦᬶᬂᬓᬤᬶ᭠ᬢᬸᬳᬦ᭄ᬓ᭄ᬬᬵᬗ᭄ᬳᬶᬂᬫᬢᬶᬦ᭄ᬬᬵᬲᬶᬋᬦ᭄᭞ᬫᬸᬓ᭄ᬢ᭄ᬬᬂᬲᬗ᭄ᬕᬫᬓᬵᬫᬢᬦ᭄ᬢ᭄ᬭᬫᬓᬤᭀᬦ᭄ᬧᬸᬢ᭄ᬭᬵᬢᬶᬥᬃᬫ᭄ᬫᭀᬢ᭄ᬢᬫ᭞ᬭᬶᬂᬪᬵᬕᬵᬥᬶᬓ
ᬧᬤ᭄ᬫᬥᬡ᭄ᬥᬕ᭄ᬮᬋᬡ᭄ᬝᬂᬩᬸᬤ᭄ᬥᬯᬷᬚᬵᬓ᭄ᬱᬭ᭞ᬲᬂᬳ᭄ᬬᬂ[]ᬩᬸᬤ᭄ᬤᬯᬶᬩᬵᬡᬲᬸᬧ᭄ᬢᬬᬕᭂᬗᭂᬦ᭄ᬭᬶᬂᬩ᭄ᬬᬹᬳᬓᬵᬫᬡ᭄ᬥᬓ᭛ᬬᬧ᭄ᬯᬦ᭄ᬫᬗ᭄ᬓᬦᬤᬾᬦ᭄ᬢᬦᬶᬢ᭄ᬬᬫᬕᬯᬾᬮᬫ᭄ᬧᬄᬲᬸᬪᬶᬓ᭄ᬱᬂᬚᬕᬢ᭄᭞ᬫ᭄ᬯᬂᬲᬓ᭄ᬯᬾᬄᬩᬮᬬᭀᬥᬬᬾᬓᬧᬭᬳᭂᬦ᭄ᬭᬶᬂᬢᬶᬰᬵ
ᬲ᭄ᬢ᭄ᬭᬦ᭄ᬮᬓᬸ᭞ᬅᬲ᭄ᬢᬫ᭄ᬢᬂᬘᬢᬸᬭᬵᬰ᭄ᬭᬫᬾᬓᬳᬭᬶᬦᭂᬦ᭄ᬭᬶᬂᬧᬜ᭄ᬘᬰᬶᬮᬵᬓ᭄ᬭᬫ᭞ᬯᬶᬥ᭄ᬬᬵᬫ᭄ᬯᬂᬩ᭄ᬭᬢᬮᬾᬦ᭄ᬢᬧᬦ᭄ᬬᬳᬸᬦᬶᬗᬦ᭄ᬤᬾᬰ᭄ᬭᬶᬦᬭᬾᬦ᭄ᬤ᭄ᬭᬵᬥᬶᬧ᭛ᬅᬧᬦ᭄ᬭᬓ᭄ᬯᬳᬦᬾᬓᬶᬧᬡ᭄ᬥᬶᬢᬫᬳᬵᬤᬸᬱ᭄ᬝᬵᬢᬶᬲᬵᬥᬸᬦ᭄ᬓᬢᭀᬦ᭄᭞ᬫᬸᬗ᭄ᬕ᭄ᬯᬶᬂᬫᬡ᭄ᬤᬮᬰᬶᬱ᭄ᬬᬲ᭠
[᭖ 6A]
ᬗ᭄ᬖ᭄ᬬᬯᬶᬓ᭄ᬱᭂᬓ᭄ᬲ᭄ᬢ᭄ᬭᬷᬲ᭄ᬢ᭄ᬭ᭄ᬬᬵᬃᬚ᭄ᬚᬫᬓ᭄ᬯᬾᬳ᭄ᬯᬶᬓᬸ᭞ᬮᬾᬦ᭄ᬢᬂᬭᬂᬩᬶᬦᬶᬂᬧ᭄ᬭᬯᬶᬭᬫᬲᬸᬭᬸᬤ᭄ᬲᬲ᭄ᬓᬵᬭᬦᬓ᭄ᬢᬷᬲ᭄ᬦᭂᬂ᭞ᬢᬦ᭄ᬮᬸᬧ᭄ᬢᬂᬧᬶᬦᬭᬦ᭄ᬬᬮᬶᬱ᭄ᬬᬫᬯᬭᬄᬥᬃᬫ᭄ᬫᬵᬢ᭄ᬫᬄᬲᬗ᭄ᬕᬫ᭛ᬬᬾᬓᬗ᭄ᬤᬾᬳᬸᬬᬗᬶᬂᬢ᭄ᬭᬶᬮᭀᬓᬫᬕᬯᬾᬲᬗ᭄ᬳᬵᬭᬳᬵᬭᭀᬳᬭ᭞ᬲᬶᬗ᭄ᬕᬶᬄᬬᬦ᭄ᬲᬸᬢ
ᬢᬢ᭄ᬯᬦᬶᬂᬧᬭᬫᬰᬶᬱ᭄ᬬᬵᬗ᭄ᬓᭂᬦ᭄ᬓᬸᬭᬹᬫ᭄ᬯᬂᬩᬧ᭞ᬢ᭄ᬭᬂᬢ᭄ᬭᬂᬦ᭄ᬬᭀᬫᬳᬸᬤᬦ᭄ᬲᬮᬄᬫᬲᬯ᭄ᬢᬸᬦ᭄ᬬᬦ᭄ᬲᬃᬯ᭄ᬯᬯᬶᬚᬦ᭄ᬯᬕᬸ᭞ᬢᬶᬲ᭄ᬢᬶᬲ᭄ᬢᬂ᭠ᬤᬰᬤᬾᬰᬤᬸᬱ᭄ᬝᬫᬮᬶᬯᭂᬃᬕ᭄ᬭᬶᬂᬢᬦ᭄ᬧᬓᬵᬮᬵᬗᬲᬸᬢ᭄᭞᭛ᬲᬂᬓ᭄ᬱᬾᬧᬦ᭄ᬬᬤᬸᬯᭂᬕ᭄ᬢᬶᬩᬵᬦᬯᬭᬥᬡ᭄ᬥᬵᬧᬡ᭄ᬥ᭄ᬬᬬᬦ᭄ᬫᬗ᭄ᬓᬦ᭞
ᬲᬓ᭄ᬯᬾᬄᬓ᭄ᬯᬾᬄᬳᬶᬓᬭᬫ᭄ᬧᬲᬦ᭄ᬯᬮᬢᬸᬗᭂᬦ᭄ᬩ᭄ᬯᬵᬗᭂᬦ᭄ᬫᬭᬾᬂᬲᬵᬕᬭ᭞ᬲ᭄ᬯᬲ᭄ᬢᬂᬭᬵᬢ᭄ᬧᬮᬧᬦ᭄ᬬᬰᬶᬱ᭄ᬬᬦᬶᬓᬢᬦ᭄ᬲᬫ᭄ᬧᬸᬃᬧ᭄ᬭᬲᬶᬤ᭄ᬥᬵᬳᬬᬸ᭞ᬤᬶᬃᬕ᭄ᬖ᭄ᬬᬵᬬᬸᬄᬲᬶᬭᬲᬂᬦᬭᬾᬦ᭄ᬤ᭄ᬭᬢᬸᬳᬸᬬᬦ᭄ᬪᬹᬧᬵᬓ᭄ᬮᬵᬗ᭄ᬭᬓ᭄ᬱᬭᬢ᭄᭛ᬲᬚ᭄ᬜᬵᬰ᭄ᬭᬷᬦᬭᬦᬵᬣᬶᬤᬶ
ᬩ᭄ᬬᬓᬳᬶᬥᭂᬧ᭄ᬮ᭄ᬯᬶᬃᬢᬶᬃᬣᬰᬸᬤ᭄ᬥᭀᬱᬥᬶ᭞ᬲᬶᬗ᭄ᬕᬶᬄᬗ᭄ᬕᬦ᭄ᬬᬧᬸᬭᬶᬄᬦᬶᬗᬫ᭄ᬩᭂᬓᬕᬯᬾᬥᬃᬫ᭄ᬫᬵᬢ᭄ᬫᬚᬵᬦᬶᬦ᭄ᬤᬶᬢ᭞ᬦᬶᬲ᭄ᬢᬦ᭄ᬬᭀᬤᬬᬰᬲ᭄ᬢ᭄ᬭᬳᬢ᭄ᬯᬚᬸᬕᬢᬦ᭄ᬫᬗ᭄ᬕᭂᬄᬢ᭄ᬓᬧ᭄ᬦᬶᬗ᭄ᬳᬸᬮᬸᬦ᭄᭞ᬤᬾᬦᬶᬂᬩᬸᬤ᭄ᬥᬶᬓᬳᬷᬦᬧᬸᬡ᭄ᬬᬦᬓᬮᬶᬲ᭄ᬭᬶᬂᬯ᭄ᬯᬂᬲᬶᬦᬗ᭄ᬕᬄᬧ᭄ᬭᬪᬸ᭛
Image 6
[᭖ 6B]
᭖
ᬬᬦ᭄ᬓᬵᬗᭂᬦ᭄ᬭᬸᬲᬶᬢᬶᬂᬕᬶᬡᬵᬫᬯᬚᬕᬢ᭄ᬢᬦ᭄ᬯ᭄ᬭᬶᬂᬤᬥᬵᬗᬾᬦᬓᬵ᭞ᬲᭃᬓ᭄ᬭᬶᬂᬯᬶᬃᬬ᭄ᬬᬫᬳᬵᬫ᭄ᬭᬪᬵᬱᬲᬓᬮᬵᬯᬓ᭄ᬖ᭄ᬬᬂᬚᬕᬢ᭄ᬓᬵᬭᬡ᭞ᬭᬵᬚᬵᬦᬸᬕ᭄ᬭᬳᬯᬶᬕ᭄ᬭᬳᬾᬓᬶᬫᬕᬯᬾᬪᬓ᭄ᬢ᭄ᬬᬵᬦᬶᬓᬂᬭᬵᬢ᭄ᬓᬩᬾᬄ᭞ᬲ᭄ᬢ᭄ᬭᬶᬭᬵᬢ᭄ᬦᬵᬥᬶᬓᬤᭀᬕᬪᭀᬚᬦ᭠
ᬧ᭄ᬦᬸᬄᬬᬾᬓᬵᬫᬗᬸᬦ᭄ᬧᬢᬓ᭛ᬢᭂᬓ᭄ᬯᬦ᭄ᬢᬦ᭄ᬓ᭄ᬯ᭄ᬦᬂᬲᬫᬶᬗ᭄ᬕᬳᬦᬲᬓ᭄ᬯᬾᬄᬦᬶᬂᬫᬳᬵᬤᬸᬃᬚ᭄ᬚᬦ᭞ᬲ᭄ᬢ᭄ᬭ᭄ᬬᬵᬦᬓ᭄ᬫ᭄ᬯᬂᬓᬸ᭠ᬮᬯᬡ᭄ᬥᬸᬬᬾᬓᬳᬫᭂᬲᭂᬦ᭄ᬬᭀᬗ᭄ᬓᭂᬦ᭄ᬓᬍᬗ᭄ᬓᬾᬂᬚᬕᬢ᭄᭞ᬬᬤ᭄ᬬᬦ᭄ᬭᬵᬓ᭄ᬱᬲᬤᬾᬢ᭄ᬬᬪᬹᬢᬫᬸᬩᬸᬭᬂᬭᬵᬢ᭄ᬤᬾᬯᬢᭀ᭠
ᬯ᭄ᬬᬤ᭄ᬪᬸᬢ᭞ᬫᬗ᭄ᬕᭂᬄᬰᬢ᭄ᬭᬸᬢ᭄ᬓᬧ᭄ᬲᬗᬵᬤᬶᬭᬶᬍᬳᭂᬂᬬᬦ᭄ᬯᬷᬭᬰᬓ᭄ᬢᬶᬂᬭᬡ᭛ᬬᬧ᭄ᬯᬦ᭄ᬲᭀᬃᬲᬶᬧᬶᬓᬵᬰ᭄ᬫᬮᬦ᭄ᬬᬦᬶᬦᬸᬘᬧ᭄ᬩ᭄ᬬᬵᬓ᭄ᬢᬵᬗ᭄ᬳᭂᬢᬶᬂᬭᭀᬭᬯ᭞ᬭᬹᬓ᭄ᬱᬵᬓ᭄ᬯᬾᬄᬦᬶᬓᬦᬂᬲ᭄ᬯᬭᬵᬚ᭄ᬬᬓᬳᬯᬂᬥᬃᬫ᭄ᬫᬵᬧ᭄ᬭᬢᬶᬱ᭄ᬝᬾᬂᬤᬗᬸ᭞ᬰᬹᬭᬵᬢ᭄ᬬᬦ᭄ᬢᬭᬶᬓᬵ
ᬲ᭄ᬢᬯᬦ᭄ᬬᬦᬢᬸᬧᬶᬲ᭄ᬬᬦ᭄ᬰᬢ᭄ᬭᬸᬦᬵᬰᬶᬤ᭄ᬪᬸᬢ᭞ᬳᬶᬗ᭄ᬲᬧᬵᬧᬦᬶᬓᬾᬓᬢᬦ᭄ᬤ᭄ᬯᬭᬸᬫᬯᬸᬄᬥᬸᬭᬵᬓᬬᭀᬰᭂᬰ᭄ᬯᬭᬦ᭄᭞᭛ᬲᬂᬓ᭄ᬱᬾᬧᬦ᭄ᬬᬯᬸᬯᬸᬲ᭄ᬧᬢᬶᬓ᭄ᬳᬚᬶᬭᬶᬲᭀᬚᬃᬰ᭄ᬭᬷᬦᬭᬾᬦ᭄ᬤ᭄ᬭᬵᬥᬶᬧ᭞ᬦ᭄ᬤᬵᬢᬦ᭄ᬲᭂᬗ᭄ᬕᬳᭂᬦᬮ᭄ᬧᬥᬃᬫ᭄ᬫᬓᬸᬤᬶᬮᬵ
[᭗ 7a]
ᬧ᭄ᬭᬂᬯᬓ᭄ᬢ᭄ᬭᬦᬶᬰ᭄ᬰᬵᬲᬦ᭞ᬦᬦ᭄ᬢᭂᬦ᭄ᬢᬦ᭄ᬳᬦᬍᬦ᭄ᬲᬓᬾᬂᬧᬭᬫᬰᬹᬦ᭄ᬬᬵᬋᬫ᭄ᬩᬦᬶᬂᬧᬵᬃᬯ᭄ᬯᬢ᭞ᬚᬵᬢᬷᬲᬗ᭄ᬕᬫᬯᬶᬖ᭄ᬦᬫᬃᬕ᭄ᬕ᭠ᬓᬭᬡᬦ᭄ᬤᬶᬦ᭄ᬬᬵᬂᬧᬦᭂᬫ᭄ᬯᬗ᭄ᬳᬬᬸ᭞᭛ᬦᬵᬳᬦ᭄ᬮᬶᬂᬦᬭᬦᬵᬣᬧᬸᬢ᭄ᬭᬫᬯᬸᬯᬸᬲ᭄ᬧᬸᬄᬢ᭄ᬯᬲ᭄ᬦᬭᬾᬦ᭄ᬤ᭄ᬭᬵᬥᬶᬧ᭞ᬫ᭄ᬯᬂᬲᬓ᭄ᬯᬾᬄᬧᬭᬯᬷᬭᬬᭀ
ᬥᬭᬸᬫ᭄ᬗᭃᬫ᭄ᬯᬂᬲᬂᬫᬳᬵᬰᬩ᭄ᬤᬶᬓ᭞ᬢᭀᬯᬶᬦ᭄ᬗ᭄ᬕᬦ᭄ᬬᬧᬥᭀᬫ᭄ᬕᭃᬦ᭄ᬫᭂᬗᭂᬦᬶᬲᬗ᭄ᬕᬸᬧ᭄ᬰ᭄ᬭᬶᬦᬭᬾᬦ᭄ᬤ᭄ᬭᬵᬢ᭄ᬫᬚ᭞ᬤᬾᬦᬶᬂᬦ᭄ᬯᬫ᭄ᬦᬶᬭᬲᬶᬗ᭄ᬳᬶᬢᬶᬂᬧᬭᬫᬢᭀᬕᬶᬦ᭄ᬤ᭄ᬭᬵᬫᬸᬦᬄᬯᬵᬳ᭄ᬬᬓ᭛ᬗ᭄ᬓᬵᬭᬓ᭄ᬭ᭄ᬬᬦ᭄ᬫᬧᬢᬶᬄᬚᬬᬾᬦ᭄ᬤ᭄ᬭᬫᬯᬸᬯᬸᬲ᭄ᬫᬃᬫ᭄ᬫᬵᬗᬮᬫ᭄ᬯᬲ᭄ᬋᬱᭂᬧ᭄᭞ᬲᬶ
ᬗ᭄ᬕᬶᬄᬮᬶᬂᬦᬶᬢᬸᬳᬦ᭄ᬓᬸᬬᭀᬕ᭄ᬬᬧᬶᬢᬸᬳᬸᬦ᭄ᬤᬾᬲᬂᬫᬳᬵᬧᬡ᭄ᬥᬶᬢ᭞ᬢᬦ᭄ᬕ᭄ᬯᬵᬳ᭄ᬬᬵᬓ᭄ᬦᬤᬾᬦᬺᬧᬵᬢ᭄ᬫᬚᬫᬦᬄᬦᬶᬂ᭠ᬰᬹᬭᬭᭀᬢ᭄ᬢᬾᬂᬢᬧ᭞ᬢᭀᬮᬶᬄᬗ᭄ᬳᬦ᭄ᬬᬢᬗᬶᬲ᭄ᬦᬭᬾᬦ᭄ᬤ᭄ᬭᬓᬢᬶᬮᬃᬫ᭄ᬯᬂᬭᬾᬡᬭᬓ᭄ᬭ᭄ᬬᬦ᭄ᬓᬭᬶ᭛ᬫᬶᬮ᭄ᬯᬂᬭᬵᬢ᭄ᬫᬓ᭄ᬢᭂᬂᬧᬥᬵᬦᬮᬳ
ᬲᭀᬦᭂᬓ᭄ᬫᬹᬃᬘ᭄ᬘᬶᬢᬵᬓ᭄ᬯᬾᬄᬫᬗᬵ᭞ᬅᬲ᭄ᬢᬫ᭄ᬢᬂᬩᬮᬯᬷᬭᬬᭀᬥᬓᬧ᭄ᬮᬦ᭄ᬧᬸᬗ᭄ᬕᭂᬮ᭄ᬫᬦᬄᬦ᭄ᬬᬾᬗ᭄ᬳᬢᬶ᭞ᬢᬦ᭄ᬳᭀᬫᭂᬦ᭄ᬢᬶᬓᬗᬫ᭄ᬩᭂᬓᬶᬂᬯ᭄ᬯᬗᬶᬦᬍᬫ᭄ᬲ᭄ᬢ᭄ᬭᬷᬓᬦ᭄ᬬᬗ᭄ᬕᭂᬂᬧᬶᬗᬶᬢ᭄᭞ᬆᬧᬦ᭄ᬭᬓ᭄ᬯᬦᬭᬾᬦ᭄ᬤ᭄ᬭᬧᬸᬢ᭄ᬭᬓᬱᬲᭂᬧ᭄ᬦ᭄ᬬᬵᬧᬹᬃᬭ᭄ᬢ᭄ᬯᬕᬾᬂᬢᬶᬮᬫ᭄᭛
Image 7
[᭗ 7B]
ᬦ᭄ᬤᬶᬦ᭄ᬗ᭄ᬯᬂᬢᬦ᭄ᬍᬍᬳᬵᬢᬸᬫᬶᬗ᭄ᬳᬮᬭᬶᬭᬹᬫ᭄ᬦᬶᬂᬫᬸᬗ᭄ᬲᬶᬭᬶᬂᬧᬹᬃᬯ᭄ᬯᬢ᭞ᬥᬷᬭᬵᬦ᭄ᬯᬵᬫᬧ᭄ᬭᬪᬸᬲᬸᬓ᭄ᬭᬯᬃᬢ᭄ᬢᬶᬢᬦᬬᬵᬤᬤ᭄ᬬᬵᬧᬭᬕ᭄ᬬᬵᬢ᭄ᬗᭃ᭞ᬘᬹᬃᬡ᭄ᬦᬂᬫᬦ᭄ᬫᬣᬭᬹᬧᬬᬾᬓᬳᬫᭂᬲᭃᬦᬶᬲ᭄ᬭᭀᬫᬫᬸᬦ᭄ᬥ᭄ᬬᬵᬢ᭄ᬫᬓ᭞ᬕᭃᬦᬶᬂᬯᬶᬃᬬ᭄ᬬᬯᬶᬰᬾᬱᬭᬓ᭄ᬯᬧᬥᭂᬫᭂᬦ᭄ᬭᬶᬂᬚ᭄ᬜᬵᬦᬰᬦ᭄ᬢᬵᬲ᭄ᬫ᭄ᬭ
ᬢᬶᬗ᭄ᬕ᭄ᬬᬸᬭᬵᬢ᭄ᬦᬦᭀᬧᬫᬢᬫ᭄ᬭᬩᬦ᭄ᬤᬫᬭᬭᬹᬫ᭄ᬢᬵᬗ᭄ᬤᬾᬧᬦᬲ᭄ᬦᬶᬗ᭄ᬳᬢᬶ᭞ᬘᬦ᭄ᬤ᭄ᬭᬵᬃᬓ᭄ᬓᬵᬤ᭄ᬪᬸᬢᬧᬹᬃᬡ᭄ᬦᬢᬧ᭄ᬯᬭᬶᬲ᭄ᬤᭂᬂᬦᬶᬂᬫᬾᬖᬓᬗ᭄ᬯᬦ᭄ᬭᬶᬭᬶᬲ᭄᭞ᬰᬲ᭄ᬢ᭄ᬭᬵᬚ᭄ᬜᬵᬥᬶᬓᬧᬡ᭄ᬥᬶᬢᬾᬂᬓᬸᬚᬪᬹᬫ᭄ᬬᬵᬢ᭄ᬬᬦ᭄ᬢᬭᬶᬂᬦᬶᬱ᭄ᬧᬮ᭞ᬫᬗ᭄ᬓᬵᬓ᭄ᬱᬢ᭄ᬭᬶᬬᬚᬦ᭄ᬫᬭᬵᬚᬲᬸᬢᬬᬦ᭄ᬫᬗ᭄ᬲ᭄ᬬᬵᬫ᭄ᬭᬶᬳᬾᬂᬰᬹᬦ᭄ᬬᬢᬦ᭄ᬢ᭄ᬬᬂ
ᬢᭀᬯᬶᬦ᭄ᬭᬓ᭄ᬯᬳᬦᬾᬓᬥᬃᬫ᭄ᬫᬓᬋᬡ᭄ᬕᬵᬤᬾᬲᬂᬫᬳᬵᬪᬶᬓ᭄ᬱᬸᬓ᭞ᬯᬺᬤ᭄ᬥ᭄ᬬᬵᬦᬓ᭄ᬧᬸᬢᬸᬬᭀᬕ᭄ᬬᬬᬾᬓᬧᬲᬸᬗᬾᬂᬫᬢ᭄ᬢᬵᬧᬶᬢᬵᬦᬶᬦ᭄ᬤᬶᬢ᭞ᬯᬶᬥ᭄ᬬᬵᬕᭀᬘᬭᬓᬶᬃᬡ᭄ᬦᬰᬶᬱ᭄ᬬᬧᬲᬸᬗᬾᬂᬥᬗ᭄ᬕᬸᬓᬦ᭄ᬢᬵᬓ᭄ᬭᬫ᭞ᬥᬃᬫ᭄ᬫᬵᬤᬾᬰᬤ᭄ᬥᬮᬓ᭄ᬱᬡᬢᬧᬵ᭠
ᬦᬸᬦ᭄ᬤᬵᬦ᭄ᬭᬶᬂᬭᬵᬢ᭄ᬓᬩᬾᬄ᭛᭜᭛ᬓᬬᭀᬕ᭄ᬬᬦᬶᬓᬫᬲ᭄ᬓᬸᬭᬓ᭄ᬯᬚᬸᬕᬲᬓ᭄ᬱᬡᬲᬸᬫᬶᬮᬶᬳᬦᬾᬦᬭᬾᬰ᭄ᬯᬭ᭞ᬅᬫᬸᬓ᭄ᬢ᭄ᬬᬓ᭄ᬦᬮᬵᬪᬦᬶᬂᬚᬬᬫᬫᬺᬤ᭄ᬥ᭄ᬬᬓ᭄ᬦᬲᬸᬢᬲᬸᬢᬦ᭄ᬢ᭄ᬭᬓᭀᬢ᭄ᬢᬫ᭞ᬯᬸᬯᬸᬲ᭄ᬧ᭄ᬯᬓᬯᬰᬂᬫᬦᬄᬮᬶᬘᬶᬦᬶᬓᬵᬧᬕᭂᬳ᭠
[᭘ 8A]
ᬢᬶᬰᬬᬯᬺᬡ᭄ᬥ᭄ᬬᬦᬶᬃᬫ᭄ᬫᬮ᭞ᬲᬫᬗ᭄ᬓᬦᬭᬾᬦ᭄ᬤ᭄ᬭᬧᬸᬢ᭄ᬭᬫᬸᬲᬶᬭᬾᬂᬓᬶᬭᬶᬲᬸᬫᬶᬓᭂᬧᬲᬦ᭄ᬤᬶᬦᬶᬂᬢᬧ᭛ᬓᬸᬦᭂᬂᬨᬮᬦᬶᬓᬾᬓᬶᬢᬦ᭄ᬧᬕᬯᬬᬵᬫ᭄ᬩᭂᬓᬤᬮᬳᬲᬤᬸᬄᬓᬦᬶᬂᬚᬕᬢ᭄᭞ᬦᬭᬾᬦ᭄ᬤ᭄ᬭᬲᬶᬭᬮᬷᬡᬲᬵᬫ᭄ᬧᬸᬦᬢᬸᬳᬵᬦ᭄ᬤᬶᬦᬲᬬᬸᬢᬭᬶᬲᬂᬦᬺᬫᬵ
ᬢ᭄ᬫᬚ᭞ᬳᬦᬧ᭄ᬯᬭᬶᬢᬗᬶᬲ᭄ᬦᬶᬓᬂᬲ᭄ᬢ᭄ᬭ᭄ᬬᬦᬓᬢᭀᬯᬶᬢᬦᬸᬘᬧᬦᬯᬃᬡ᭄ᬦᬩᬜ᭄ᬘᬦ᭞ᬧᬸᬭᬷᬲᬳᭂᬬᭂᬗᬶᬂᬧᬥᬫ᭄ᬯᬦᬶᬓᬢᬦ᭄ᬓᬳᬢᬓ᭄ᬦᬢ᭄ᬓᬧ᭄ᬫᬳᬵᬃᬤ᭄ᬥᬶᬓ᭛᭜᭛ᬦᬵᬤᬾᬚᬬᬾᬦ᭄ᬤ᭄ᬭᬫᬯᬸᬯᬸᬲ᭄ᬭᬶᬦᬭᬾᬦ᭄ᬤ᭄ᬭᬧᬸᬢ᭄ᬭ᭞ᬥᬂᬳ᭄ᬬᬂᬫᬳᭀᬱᬥᬶᬧᬸᬭᭀᬳᬶ
ᬢᬯᬶᬚ᭄ᬜᬵᬫᭀᬚᬃ᭞ᬬᭀᬕ᭄ᬬᬓᬶᬭᬓ᭄ᬯᬭᬶᬳᬢᬹᬃᬦ᭄ᬬᬫᬳᬵᬢᬶᬪᬵᬕ᭄ᬬ᭞ᬲᬶᬗ᭄ᬕᬶᬄᬧᬸᬭᬶᬄᬦᬶᬗᬢᬶᬪᬓ᭄ᬢᬶᬯᬶᬰᬾᬱᬫᬦ᭄ᬢ᭄ᬭᬶ᭛ᬮᬵᬯᬦ᭄ᬫᬸᬯᬄᬢ᭄ᬫᬳᬶᬓᬾᬓᬶᬦᬦᬶᬦ᭄ᬥ᭄ᬬᬲᬹᬓ᭄ᬱ᭄ᬫ᭞ᬳᬦ᭄ᬲᬗ᭄ᬓᬭᬶᬂᬫᬋᬦᬫᬸᬱ᭄ᬝᬶᬯᬭᬄᬫᬸᬦᬶᬦ᭄ᬤ᭄ᬭ᭞ᬦ᭄ᬬᬵᬂᬲᬧ᭄ᬢᬬᭀᬕᬕ᭄ᬮᬋᬦ᭄ᬢᬲ
ᬳᬾᬦ᭄ᬤᬶᬓᬦ᭄ᬬ᭞ᬩ᭄ᬬᬓ᭄ᬢᬂᬲ᭄ᬯᬘᬶᬢ᭄ᬢᬫᬫᬕᭂᬄᬢ᭄ᬓᬭᬶᬂᬦᬶᬭᬵᬢ᭄ᬫ᭄ᬬ᭛ᬦ᭄ᬬᬵᬂᬰᬹᬦ᭄ᬬᬧᬵᬚᬭᬮᬶᬂᬢᬫᬭᬾᬂᬯᬦᬵᬤ᭄ᬭᬶ᭞ᬗ᭄ᬓᬾᬭᬵᬕ᭄ᬬᬰᬹᬦ᭄ᬬᬢᬢ᭄ᬫᬄᬦᬶᬓᬫᬾᬭᬸᬢᬸᬮ᭄ᬬ᭞ᬭᬶᬂᬰᬹᬦ᭄ᬬᬦᬵᬕᬭᬧᬥᬦ᭄ᬬᬦᬫᬸᬓ᭄ᬢᬶᬧᬵᬧ᭞ᬬᬦ᭄ᬢᬦ᭄ᬯ᭄ᬭᬸᬄᬳᬶᬧᬭᬫᬰᬹ