Kakawin Negara Kertagama C
This page has been accessed 19,599 times.
Front and Back Covers
Leaf 1
[᭑ 1B]
᭑᭞
᭛ ᭐ ᭛ ᬅᬯᬶᬖ᭄ᬦᬫᬵᬲ᭄ᬢᬸ ᭛ ᭐ ᭛ ᬒᬁᬦᬵᬣᬵᬬᬦᬫᭀᬲ᭄ᬢᬸᬢᬾᬲᬢᬸᬢᬶᬦᬶᬗᬢ᭄ᬧᬤᬭᬶᬧᬤᬪᬝᬵᬭᬦᬶᬢ᭄ᬬᬰ᭞ ᬲᬂᬲᬹᬓ᭄ᬱ᭄ᬫᬾᬂᬢ᭄ᬮᭂᬗᬶᬂᬲᬫᬵᬥᬶᬰᬷᬯᬩᬸᬤ᭄ᬥᬲᬶᬭᬱᬓᬮᬦᬶᬱ᭄ᬓᬮᬵᬢ᭄ᬫᬓᬵ᭞ ᬲᬂᬰ᭄ᬭᬷᬧᬃᬯ᭄ᬯᬢᬦᬵᬣᬦᬵᬣᬦᬶᬗᬦᬵᬣᬦᬶᬭᬢᬧᬢᬶᬦᬶᬂᬚᬕᬢ᭄ᬧᬢᬶ᭞ ᬲᬂᬳ᭄ᬬᬂᬦᬶᬗ᭄ᬳ᭄ᬬᬂᬗᬶᬦᬶᬱ᭄ᬝ᭄ᬬ
ᬘᬶᬦ᭄ᬢ᭄ᬬᬦᬶᬗᬘᬶᬦ᭄ᬢ᭄ᬬᬳᬦᬵᬯᬬᬢ᭄ᬫᬄᬦᬶᬭᬾᬂᬚᬕᬢ᭄᭛ᬩ᭄ᬬᬵᬧᬶᬩ᭄ᬬᬵᬧᬓᬲᬃᬯ᭄ᬯᬢᬢ᭄ᬯᬕᬢᬦᬶᬕᬸᬡᬲᬶᬭᬭᬶᬗᬧᬓ᭄ᬱᬯᬾᬱ᭄ᬡᬯ᭞ᬭᬶᬂᬬᭀᬕᬷᬰ᭄ᬯᬭᬧᭀᬭᬸᬱᭂᬂᬓᬧ᭄ᬧᬶᬮᬚᬫ᭄ᬪᬮᬲᬓᬮᬲᬶᬭᬵᬦ᭄ᬳ᭄ᬬᬗᬶᬂᬥᬦ᭞ᬰ᭄ᬭᬷᬯᬵᬕᬷᬦ᭄ᬤ᭄ᬭᬲᬶᬭᬵᬦ᭄ᬳ᭄ᬬᬗᬶᬂᬲᬓᬮᬰᬵᬲ᭄ᬢ᭄ᬭᬫᬦᬲᬶᬚᬲᬶᬭᬾᬲ᭄ᬫᬭᬵᬕ᭄ᬫ᭞ᬭᬶᬂᬯᬶ᭠
ᬯᬶᬖ᭄ᬦᭀᬢ᭄ᬲᬭᬦᬧ᭄ᬭᬬᭀᬕᬬᬫᬭᬵᬚᬲᬶᬭᬫᬓᬨᬮᬚᬕᬤ᭄ᬥᬶᬢ᭛ᬦᬵᬳᬦ᭄ᬤᭀᬦᬶᬗᬸᬫᬲ᭄ᬢᬸᬢᬶᬧᬤᬦᬶᬭᬵᬳ᭄ᬬᬸᬦᬸᬫᬶᬓᭂᬢᬚᬢᬾᬦᬭᬾᬰ᭄ᬯᬭ᭞ᬲᬂᬰ᭄ᬭᬷᬦᬵᬣᬭᬶᬯᬶᬮ᭄ᬯᬢᬶᬓ᭄ᬢᬳᬚᬶᬭᬵᬚᬲᬦᬕᬭᬯᬶᬰᬾᬱᬪᬹᬧᬢᬶ᭞ᬲᬓ᭄ᬱᬢ᭄ᬚᬦ᭄ᬫᬪᬝᬵᬭᬦᬵᬣᬲᬶᬭᬦᬗ᭄ᬳᬶᬮᬗᬓᭂᬦᬶᬓᬮᬗ᭄ᬓᬦᬶᬂᬧ᭄ᬭᬚᬵ᭞ᬳᭂ
ᬦ᭄ᬢ᭄ᬬᬂᬪᬹᬫᬶᬚᬯᬵᬢᬶᬪᬓ᭄ᬢᬶᬫᬦᬸᬓᬸᬮᬢᬸᬫᬸᬮᬸᬬᬶᬢ᭄ᬓᬾᬂᬤᬶᬕᬦ᭄ᬢᬭ᭛ᬭᬶᬂᬰᬵᬓᬢ᭄ᬢᬸᬃᬰᬭᬾᬦᬭᬓ᭄ᬯᬭᬶᬯᬶᬚᬶᬮ᭄ᬦᬺᬧᬢᬶᬢ᭄ᬮᬲᬶᬦᬲ᭄ᬢ᭄ᬯᬓᭂᬦ᭄ᬧ᭄ᬭᬪᬹ᭞ᬅᬦ᭄ᬕᬃᬩ᭄ᬪᬾᬰ᭄ᬯᬭᬦᬵᬣᬭᬶᬂᬓᬳᬸᬭᬶᬧᬦ᭄ᬯᬶᬳᬕᬦᬶᬭᬦᬫᬵᬦᬸᬱᬵᬦ᭄ᬪᬸᬢ᭞ᬮᬶᬡ᭄ᬟᬸᬂᬪᬹᬫᬶᬓ᭄ᬢᬸᬕ᭄ᬳᬸᬤᬦ᭄ᬳᬯᬸᬕᭂᬋᬳ᭄ᬓᬶᬮᬢᬯᬶᬍᬢᬦᬶᬂᬦᬪᬲ᭄ᬢᬮ᭞ᬕᬸᬦ᭄ᬢᬸᬃᬢ᭄ᬢᬂᬳᬶᬫ
[᭒ 2A]
ᬯᬵᬦ᭄ᬭᬶᬓᬵᬫ᭄ᬧᬸᬤᬦᬦᬂᬓᬸᬚᬦᬓᬸᬳᬓᬫᬵᬢᬶᬢᬦ᭄ᬧᬕᬧ᭄᭛ᬦᬵᬳᬦ᭄ᬳᬶᬗᬤᬶᬭᬵᬪᬝᬵᬭᬕᬶᬭᬶᬦᬵᬣᬲᬓᬮᬫᬢ᭄ᬫᬄᬧ᭄ᬭᬪᬹᬢ᭄ᬢᬫ᭞ᬦᬮ᭄ᬯᬶᬃᬲᬵᬤᬵᬳᭂᬕᬶᬭᬾᬓ᭄ᬦᬂᬲᬬᬯᬪᬹᬫᬶᬲᬯᬢ᭄ᬮᬸᬓᬸᬫᬸᬗ᭄ᬓᬸᬮᬵᬤᬭ᭞ᬯᬶᬧ᭄ᬭᬓ᭄ᬱᬢ᭄ᬭᬯᬿᬰ᭄ᬬᬰᬸᬤ᭄ᬭᬘᬢᬹᬭᬰ᭄ᬭᬫᬲᬫᬦᬶᬧᬸᬡᬾᬂᬲᬫᬵᬳᬶᬢᬵ᭞ᬳᭂᬦ᭄ᬢ᭄ᬬᬂᬤᬸᬃᬚ᭄ᬚᬦᬫᬃᬬ᭄ᬬᬩᬸ᭠
ᬤ᭄ᬥᬶᬓᬮᬓᬾᬯᬮᬫᬢᬓᬸᬢᬶᬯᬶᬃᬬ᭄ᬬᬲᬂᬧ᭄ᬭᬪᬹ᭛ ᭜ ᭛ᬦ᭄ᬤᬦ᭄ᬲᬂᬰ᭄ᬭᬷᬭᬵᬚᬧᬢ᭄ᬦᬷᬧ᭄ᬭᬓᬰᬶᬢᬲᬶᬭᬫᬵᬢᬵᬫᬳᬵᬰ᭄ᬭᬷᬦᬭᬾᬦ᭄ᬤ᭄ᬭ᭞ᬲᬂᬮ᭄ᬯᬶᬃᬧᬵᬯᬓ᭄᭠ᬪᬝᬭᬶᬧᬭᬫᬪᬕᬯᬢᬶᬘᬢ᭄ᬭᬦᬶᬗ᭄ᬭᬵᬢ᭄ᬯᬶᬰᬾᬱ᭞ᬉᬢ᭄ᬲᬳᬾᬂᬬᭀᬕᬩᬸᬤ᭄ᬥᬲᬭᬡᬕᬶᬦᭃᬗᬶᬭᬵᬦ᭄ᬲᬶᬯᬭᬶᬯᬺᬤ᭄ᬥᬫᬳᬸᬡ᭄ᬟᬶ᭞ᬭᬶᬂᬰᬵᬓᬤᬺᬱ᭄ᬝᬶᬲᬵᬧ᭄ᬢᬵᬭᬸ᭠
ᬡᬓᬮᬳᬦᬶᬭᬵᬦ᭄ᬫᭀᬓ᭄ᬢᬫᬸᬗ᭄ᬲᬶᬢ᭄ᬓᬩᬸᬤ᭄ᬥᬦ᭄᭛ᬬ᭄ᬬᬃᬦ᭄ᬢᬸᬓ᭄ᬰ᭄ᬭᬷᬭᬵᬚᬧᬢ᭄ᬦᬷᬚᬶᬦᬧᬤᬓᬯ᭄ᬓᬲ᭄ᬤᬸᬄᬓᬶᬢᬗ᭄ᬭᬵᬢ᭄ᬩ᭄ᬬᬫᭀᬳ᭞ᬬ᭄ᬬᬵᬃᬤᭂᬕ᭄ᬰ᭄ᬭᬷᬦᬵᬣᬫᬸᬗ᭄ᬕ᭄ᬯᬶᬂᬫᬛᬧᬳᬶᬢᬸᬫᬸᬮᬸᬬ᭄ᬢᬸᬱ᭄ᬝᬵᬫᬗ᭄ᬕᭃᬂᬓᬪᬓ᭄ᬢᬶᬦ᭄᭞ᬭᬾᬡᬰ᭄ᬭᬷᬦᬵᬣᬲᬂᬰ᭄ᬭᬷᬢ᭄ᬭᬶᬪᬹᬯᬦᬚᬶᬯᬬᭀᬢ᭄ᬢᬸᬗ᭄ᬕᬤᬾᬯᬶᬕᬸᬫᬦ᭄ᬢᬶ᭞ᬫᬸᬗ᭄ᬕ᭄ᬯᬶᬂᬭᬵᬚ᭄ᬬᬾᬭᬶᬓᬂᬚᬷᬯ
ᬦᬧᬸᬭᬲᬶᬭᬢᬵᬫ᭄ᬯᬂᬫ᭄ᬯᬗᬶᬰ᭄ᬭᬷᬦᬭᬾᬦ᭄ᬤ᭄ᬭ᭛ ᭜ ᭛ᬢᭂᬓ᭄ᬯᬦ᭄ᬪᬓ᭄ᬢᬶᬲᬶᬭᬵᬦ᭄ᬫᬓᬾᬩᬸᬭᬶᬲᬶᬭᬰ᭄ᬭᬷᬭᬵᬚᬧᬢ᭄ᬦᬷᬰ᭄ᬭᬭᬶ᭞ᬲᬢ᭄ᬬᬵᬪᬸᬢ᭄ᬩ᭄ᬭᬢᬧᬓ᭄ᬱᬲᭀᬕᬢᬫᬲᬂᬲ᭄ᬓᬵᬭᬾᬤᬕᬦ᭄ᬲᬂᬧ᭄ᬚᬄ᭞ᬢᬦ᭄ᬲᬄᬰ᭄ᬭᬷᬓᬺᬢᬯᬃᬤ᭄ᬥᬦᬾᬰ᭄ᬯᬭᬧᬶᬢᬵᬤᬾᬰ᭄ᬭᬷᬦᬭᬾᬦ᭄ᬤ᭄ᬭᬵᬥᬶᬧ᭄᭞ᬲᬾᬤᬫ᭄ᬧᬢ᭄ᬬᬧᬕᭂᬄᬲᬶᬭᬾᬂᬲᬸᬕᬢᬫᬵᬃᬕ᭄ᬕᬗ᭄ᬤᬾᬲᬸᬓᬦᬶᬂᬚᬕᬢ᭄᭛
Leaf 2
[᭒ 2B]
᭒᭞
ᬦ᭄ᬤᬦ᭄ᬰ᭄ᬭᬷᬪᬹᬧᬢᬶᬲᬂᬧᬶᬢᬵᬦᬺᬧᬢᬶᬫᬸᬗ᭄ᬕ᭄ᬯᬶᬂᬲᬶᬗ᭄ᬳᬲᬵᬃᬬ᭄ᬬᬧᬕᭂᬄ᭞ᬲᬵᬓ᭄ᬱᬵᬢ᭄ᬳ᭄ᬬᬂᬯᬭᬭᬢ᭄ᬦᬲᬫ᭄ᬪᬯᬲᬶᬭᬵᬦ᭄ᬫᬵᬗ᭄ᬕᭂᬄᬧᬭᬵᬃᬢ᭄ᬢᬂᬚᬕᬢ᭄᭞ᬥᬶᬭᭀᬢ᭄ᬲᬵᬳᬲᬶᬭᬾᬓᬤᬺᬤ᭄ᬥ᭄ᬬᬦᬶᬓᬦᬂᬭᬵᬢ᭄ᬲᬢ᭄ᬬᬪᬓ᭄ᬢ᭄ᬬᬾᬳᬚᬶ᭞ᬮᬕ᭄ᬬᬵᬗ᭄ᬕᭂᬕ᭄ᬯᬦᬶᬓᬃᬬ᭄ᬬᬲᬳᬦᬓᬵᬥ᭄ᬬᬓ᭄ᬱᬵᬢᬶᬤᬓ᭄ᬱᬾᬂᬦᬬ᭛ ᭜ ᭛ᬫᬸᬯᬳᬶᬩᬸᬳᬚᬶᬲᬂᬦᬭᬾᬦ᭄ᬤ᭄ᬭᬵᬦᬸ
ᬚᬵᬤᬾᬳᬚᬶᬚᬶᬯᬦ᭞ᬧ᭄ᬭᬓᬰᬶᬢᬳᬚᬶᬭᬵᬚᬤᬾᬯᬷᬫᬳᬵᬭᬵᬚᬲᬵᬦᬶᬦ᭄ᬤᬶᬢ᭞ᬲᬶᬭᬢᬲᬶᬦᬶᬯᬶᬭᬶᬂᬤᬵᬳᬦᭀᬧᬫᬾᬂᬧᬭᬶᬂᬲᬤ᭄ᬕᬸᬡ᭞ᬲᬫᬲᬓᬮᬯᬦ᭄ᬳᬚᬶᬚᬶᬯᬦᬮ᭄ᬯᬶᬃᬲᬸᬤᬾᬯ᭄ᬬᬵᬧᬮᬶᬄ᭛ᬧ᭄ᬭᬶᬬᬳᬚᬶᬲᬗᬸᬫᬸᬗ᭄ᬕ᭄ᬯᬶᬂᬯᭂᬗ᭄ᬓᭂᬃᬩᬗᬸᬦ᭄ᬳ᭄ᬬᬗᬸᬧᬾᬦ᭄ᬤ᭄ᬭᬵᬦᬸᬭᬸᬦ᭄᭞ᬦᬺᬧᬢᬶᬯᬶᬚᬬᬭᬵᬚᬲᬵᬓᭀᬧᬫᬾᬂᬧᬭᬫᬚ᭄ᬜᭀᬢ᭄ᬢᬫ᭞ᬲᬫᬲᬫᬓᬮᬯᬦ᭄ᬦᬺᬧᬢᬶᬲᬶᬗ᭄ᬳᬲᬵᬃᬬ᭄ᬬᬓᬯᬓ᭄ᬱᬧᬕᭂᬄ᭞ᬲᬶᬭᬯᬶᬳᬶᬓᬦᬶᬳᬬ᭄ᬯᬦᬶᬂᬣᬵᬦᬶᬬᬵᬯᬢ᭄ᬲᬪᬹᬫᬶᬚᬯ᭛ ᭜ ᭛ᬯ᭄ᬯᬦ᭄ᬢᭂᬦ᭄ᬢᬵᬭᬶᬳᬚᬶ᭠ᬭᬶᬯᬶᬮ᭄ᬯᬢᬶᬓ᭄ᬢᬭᬵᬚ᭄ᬜᬶ᭞ᬲᬗ᭄ᬫᬸᬫᬸᬗ᭄ᬕ᭄ᬯᬶᬂᬮᬲᭂᬫᬦᬸᬭᬕᬭᬶᬗ᭄ᬓᬳᬬ᭄ᬯᬦ᭄᭞ᬧᬸᬢ᭄ᬭᬷᬰ᭄ᬭᬷᬦᬭᬧᬢᬶᬭᬶᬂᬤᬳᬵᬧ᭄ᬭᬓᬵᬰ᭞ᬲᬂᬰ᭄ᬭᬷᬭᬵᬚᬲᬤᬸᬳᬶᬢᬾᬦ᭄ᬤᬸᬤᬾᬯ᭄ᬬᬦᬶᬦ᭄ᬤ᭄ᬬ᭛ᬦ᭄ᬤᬦ᭄ᬰ᭄ᬭᬷᬯᬃᬤ᭄ᬥᬦ
ᬤᬸᬳᬶᬢᬾᬰ᭄ᬯᬭᬷᬧᬫᬸᬗ᭄ᬲᬸ᭞ᬭᬵᬚᬷᬫᬸᬗ᭄ᬕ᭄ᬯᬶᬂᬧᬚᬗᬦᭀᬧᬫᬾᬂᬭᬭᬲ᭄ᬭᬸᬫ᭄᭞ᬧᬸᬢ᭄ᬭᬷᬰ᭄ᬭᬷᬦᬺᬧᬢᬶᬭᬶᬚᬷᬯᬦᬧ᭄ᬭᬓᬵᬰ᭞ᬅᬦ᭄ᬲᬵᬓ᭄ᬱᬵᬢᬦᬸᬚᬢ᭄ᬓᬧ᭄ᬦᬶᬭᬂᬦ᭠ᬭᬾᬦ᭄ᬤ᭄ᬭᬵ᭛ ᭜ ᭛ᬧᬾᬦᬦ᭄ᬰ᭄ᬭᬷᬦᬭᬦᬵᬣᬓᬧ᭄ᬯᬢᬳᬸᬯᬸᬲ᭄ᬮᬩ᭄ᬥᬪᬶᬱᬾᬓᬧ᭄ᬭᬪᬹ᭞ᬲᬂᬦᬵᬣᬾᬂᬫᬢᬳᬸᬦ᭄ᬧ᭄ᬭᬶᬬᬦᬺᬧᬢᬶᬲᬗ᭄ᬭᬵᬚ᭄ᬬᬾᬂᬮᬲᭂᬫ᭄ᬲᬸᬰ᭄ᬭᬫ᭞ᬲᬂᬰ᭄ᬭᬷᬭᬵᬚ᭠
[᭓ 3A]
ᬲᬯᬃᬤ᭄ᬥᬦᬧ᭄ᬭᬰᬰᬶᬢᬾᬂᬭᬹᬧᬵᬥᬶᬯᬶᬚ᭄ᬜᬾᬂᬦᬬ᭞ᬢᬦ᭄ᬲᬾᬦ᭄ᬤᬳᬲ᭄ᬫᬭᬧᬶᬗ᭄ᬕᬮᬵᬧᬢᭂᬫᬸᬲᬂᬦᬵᬣᬾᬦᬍᬫ᭄ᬦᬶᬂᬚᬕᬢ᭄᭛ᬲᬂᬦᬵᬣᭂᬂᬧᬕᬸᬳᬦ᭄ᬧ᭄ᬭᬶ᭠ᬬᬦᬺᬧᬢᬶᬲᬂᬭᬵᬚᬷᬧ᭄ᬭᬢᬶᬱ᭄ᬝᬾᬂᬧ᭄ᬚᬂ᭞ᬓ᭄ᬬᬵᬢᬷᬰ᭄ᬭᬷᬦᬺᬧᬢᬶᬲᬶᬗ᭄ᬳᬯᬃᬤ᭄ᬥᬦᬲᬸᬭᬹᬧᬵᬦ᭄ᬯᬫ᭄ᬲᬸᬰᬶᬮᬵᬧᬕᭂᬄ᭞ᬅᬰ᭄ᬭ᭄ᬬᬵᬯᬃᬡ᭄ᬦᬫᬦᬓ᭄ᬓᬸᬫᬭᬲᬳᬤᬾᬯᬶᬥᬵᬧᬧᬗ᭄ᬕᬶᬄ᭠ᬦᬶᬭ᭞ᬪᬓ᭄ᬢᬷᬚᭃᬂᬳᬚᬶᬧᬵᬲᬶᬳᬯ᭄ᬯᬗᬦᬓᬗ᭄ᬤᬾᬢᬸᬱ᭄ᬝᬦᬶᬦᬵᬕᬭ᭛ᬢᭂᬓ᭄ᬯᬦ᭄ᬯᬺᬤ᭄ᬥ᭄ᬬᬯ᭄ᬓᬾᬦᬭᬾᬦ᭄ᬤ᭄ᬭᬵᬲᬂᬗᬸᬫᬸᬗ᭄ᬕ᭄ᬯᬶᬂᬯᬶᬭᬪᬹᬫ᭄ᬬᬂᬥᬶᬭᬶ᭞ᬲᬂᬰ᭄ᬭᬷᬦᬵᬕᬭᬯᬃᬤ᭄ᬥᬦᬶᬧ᭄ᬭᬢᬷᬕᬭᬵᬚᬷᬓᬵᬦ᭄ᬬᬓᬵᬦᭀᬧᬫ᭄᭞ᬦ᭄ᬤᬦ᭄ᬭᬦ᭄ᬢᭂᬦ᭄ᬳᬚᬶᬭᬵᬚᬭᬢ᭄ᬯᬶᬂᬫᬢᬭᬫ᭄ᬮ᭄ᬯᬶᬃᬳ᭄ᬬᬂᬓᬸᬫᬵᬕᬵᬦᬸᬭᬸᬦ᭄᭞ᬲᬂᬰ᭄ᬭᬷᬯᬶᬓ᭄ᬭᬫᬯᬤ᭄ᬥᬦᬾᬰ᭄ᬯᬭᬧᬦᬶᬗ᭄ᬓᬄᬰ᭄ᬭᬷᬦᬭᬾᬦ᭄ᬤ᭄ᬭᬵ
ᬥᬶᬧ᭛ᬯᬸᬗ᭄ᬲᬸᬰ᭄ᬭᬷᬦᬺᬧᬢᬶᬧᬚᬂᬲᬶᬦᬶᬯᬶᬫᬸᬂᬗ᭄ᬕ᭄ᬯᬶᬂᬧᬯ᭄ᬯᬦᬯ᭄ᬯᬦᬧᬸᬭᬷ᭞ᬭᬵᬚᬷᬰ᭄ᬭᬷᬲᬸᬭᬯᬃᬤ᭄ᬥᬦᬶᬦ᭄ᬯᬫᬶᬭᬯᬵᬮᬮ᭄ᬯᬶᬃᬳᬚᭂᬂᬦᬶᬂᬢᬸᬮᬶᬲ᭄᭞ᬲᬓ᭄ᬯᬾᬄᬰ᭄ᬭᬷᬬᬯᬭᬵᬚᬲᬧᬥᬫᬤᬸᬤ᭄ᬯᬦ᭄ᬦᬕᬭᬵᬢᬸᬗ᭄ᬕᬮᬦ᭄᭞ᬏᬓᬲ᭄ᬣᬵᬦᬭᬶᬯᬶᬮ᭄ᬯᬢᬶᬓ᭄ᬢᬫᬗᬶᬲᬧ᭄ᬯᬷᬲᬂᬦᬭᬾᬦ᭄ᬤ᭄ᬭᬵᬥᬶᬧ᭛ ᭜ ᭛ᬯᬃᬡ᭄ᬦᬦ᭄ᬰ᭄ᬭᬷᬦᬭᬦᬵᬣᬓᬲ᭄ᬢᬯᬦᬶᬭᬦ᭄ᬤᬦᬓᬭᬲ
ᬫᬤᬶᬕ᭄ᬚᬬᬧ᭄ᬭᬪᬹ᭞ᬪ᭄ᬭᬱ᭄ᬝᬂᬰᬢ᭄ᬭᬸᬩᬗᬸᬦ᭄ᬢᬫᬶᬥ᭄ᬭᬲᬳᬦᬾᬪᬹᬯᬦᬭᬶᬦᬯᬲᬦ᭄ᬦᬭᬾᬰ᭄ᬯᬭ᭞ᬢᬸᬱ᭄ᬝᬵᬲᬚ᭄ᬚᬦᬧᬗᬚᬫᬫᬶᬓᬦᬗ᭄ᬓᬸᬚᬦᬓᬸᬫᬸᬤᬲᬢ᭄ᬬᬲᬢ᭄ᬯᬶᬓᬵ᭞ᬲ᭄ᬣᬶᬢ᭄ᬬᬂᬖ᭄ᬭᬵᬫᬲᬪᬹᬫ᭄ᬬᬯᬾᬄᬥᬦᬩᬗᬸᬦ᭄ᬚᬮᬳᬶᬦᬢᬸᬭᬓᭂᬦ᭄ᬬᬲᬓ᭄ᬭᬫ᭛ᬮ᭄ᬯᬶᬃᬲᬂᬳ᭄ᬬᬂᬰᬢᬫᬦ᭄ᬬᬸᬫᬗ᭄ᬳᬸᬤᬦᬶᬭᬵᬢ᭄ᬳᬚᬶᬢᬸᬫᬸᬮᬓᬶᬤᬸᬄᬓᬦᬶᬂᬧ᭄ᬭᬚᬵ᭞᭠